Osteyopowoz la: Depistaj pou Pèt nan Mas Zo a

Tès dansite zo

Tès dansite zo a san danje, rapid, fasil epi san doulè. Li ka jwenn osteyopowoz la anvan yon ka zo kase rive. Li ka mezire tou kijan tretman an fonksyone. Gen plizyè kalite tès ou ka fè. Yo gen ladan yo:

• Tès santral. Yo itilize sa pou tès depistaj ak dyagnostik. Yo mezire dansite nan anch lan ak kolòn vètebral la. Tès santral prensipal la se yon Radyografi espesyal ki rele egzamen DEXA (absòpsyometri bifotonik avèk rayon-X). DEXA a se tès estanda dansite zo.

• Tès periferik. Yo itilize sa pou tès depistaj. Yo mezire dansite nan dwèt, ponyèt, jenou, tibia, oswa talon. Yon tès periferik komen se iltrason kantitativ (QUS). Men tès QUS la pa presi menm jan ak tès DEXA a. 

  

Ki moun ki ta dwe teste?

• Tout fanm ki nan menopoz ki gen mwens pase 65 an, avèk 1 oswa plis faktè risk anplis menopoz la

• Tout fanm ki gen 65 làne oswa plis

• Fanm ki nan menopoz ak ka zo kase

• Fanm ki anvizaje yon tretman pou maladi osteyopowoz la

• Fanm ki sou tretman òmòn depi yon bann tan

• Fanm oswa gason ki gen kèk pwoblèm sante (tankou dyabèt) oswa k ap pran kèk medikaman (tankou glucocorticoids oswa prednisone) pandan lontan

Sit tès komen sou kò ou

Nenpòt zo ka kase. Men ak osteyopowoz la, kèk zo kase pi fasil. Sa yo gen ladan yo zo nan kolòn vètebral la, ponyèt, zepòl, ak anch. Se poutèt sa tès dansite zo yo ka fèt nan 1 oswa plizyè nan sit sa yo sou kò ou.

Konprann rezilta ou yo

Rezilta tès ou yo ka twouble w nan yon premye moman. Mande founisè w la eksplikasyon. Yo pral konpare dansite mineral zo ou (BMD) ak BMD yon zo jèn, ki an sante. Rezilta a rele yon eskò-T. Zo yo fè tisi (remodlaj) nan rit diferan. Se konsa, yon eskò-T an sante nan ponyèt la pa vle di kolòn vètebral la an sante tou. Se poutèt sa yo ka analize plis pase 1 sit sou kò ou.