Swen pou Tete Apre Akouchman an

Fè fas ak enflamasyon

Men konsèy pou w ka fè fas ak enflamasyon tete yo:

• Itilize konprès frèt oswa yon pake glas pou diminye doulè a.

• Bay tete souvan pou anpeche lèt la bouche kanal tete w yo.

• Si pwent tete w yo plat akòz tete yo anfle, tire enpe lèt alamen. Mase epi peze tete w pou kèk gout lèt ka soti.

• Si ou gen enflamasyon ak doulè oswa lafyèv, rele founisè swen sante w la.

Pou w evite gen pwent tete fè mal

Men konsèy pou w ka evite gen pwent tete fè mal:

• Asire w ti bebe w la byen pran tete a. Bouch ti bebe a dwe byen ouvri epi tout areyòl la dwe antre nan bouch li.

• Ou ka kite lèt la sèch sou pwent tete w. Lèt sèch sa a kapab pwoteje po ki sou pwent tete a.

• Pa itilize alkòl, savon, oswa netwayan ki santi bon sou tete w. Sa yo ka lakoz pwent tete yo sèk epi fann.

• Pa mete ranbouraj soutyen alètman ki kouvri ak plastik. Yo kenbe imidite epi yo ka lakòz tete yo fann.

• Si ou gen pwent tete w ki fann oswa k ap senyen, al kay founisè swen sante ou a oswa kay yon konsiltan laktasyon. Y ap asire yo si jan ti bebe a pran tete a kòrèk epi yo ka sijere w yon tretman topik, tankou lanolin pi.

Chwazi yon bon soutyen

Kounye a, li vin pi enpòtan pou w mete gwosè soutyen ki bon an. Si yon soutyen twò sere, li ka lakòz yon kanal nan tete w bouche epi vin irite. Si sa a posib, mande yon machann soutyen pou l ede w chwazi yon nouvo soutyen k ap bon pou ou. Chèche youn ki 100% koton epi ki konfòtab. Epitou chwazi yon soutyen ki gen bretèl laj ki p ap antre nan do w ak nan zepòl ou. Si w ap bay tete, jwenn yon soutyen pou alètman ki pèmèt ou dekouvri yon tete alafwa.

Si w p ap bay tete

Men konsèy pou w anpeche malèz:

• Pa eksite pwent tete w

• Mete yon soutyen ki byen chita

• Mete konprès frèt oswa pake glas sou tete a si w gen malèz

Kilè pou w rele founisè swen sante w la

Rele founisè swen sante ou a imedyatman si ou genyen youn nan sa yo:

• Lafyèv oswa frison

• Gwo fatig oubyen kò fè mal, tankou w te gen grip

• Youn oswa tou de tete yo ap boule w oswa ap fè w mal

• Tras wouj sou yon tete

• Pwen ki di oswa ki tankou ti grenn nan youn oswa tou de tete yo

• Ou santi youn oswa tou de tete w cho oswa chofe

• Tete yo tèlman anfle ti bebe w la pa ka kenbe pwent tete yo nan bouch li

• Pwent tete ki fann oswa k ap senyen

• Gen yon ti kantite lèt ki fèb oswa lèt ou pa koule byen